«Վեոլիա Ջուր» ընկերությունն ավարտել է «Գառնի-Երևան» 1000 մմ տրամագծով ջրատարի վրա իրականացվող աշխատանքները։ Ընկերության մասնագետներն աշխատել են նաև գիշերային ժամերին՝ աշխատանքները նախատեսված ժամկետում ավարտելու և սպառողների ջրամատակարարումը հնարավորինս արագ վերականգնելու նպատակով։ Աշխատանքների իրականացման պատճառով հայտարարվել էր 36-ժամյա ջրանջատում։ Նման տրամագծով ջրատարի վրա տեխնիկական աշխատանքներ սկսելուց առաջ անհրաժեշտ է ամբողջությամբ դատարկել խողովակաշարը, ինչը ժամանակատար գործընթաց է։ Խոշոր ջրանջատումների ժամանակ «Վեոլիա Ջուր»-ը, որպես կանոն, փորձում է միաժամանակ լուծել տվյալ ջրատարի հետ կապված մի քանի տեխնիկական խնդիր։
Այս անգամ Էրեբունիում փոխարինվել է փական, ջրատարի տարբեր հատվածներում վերացվել են մի քանի վթարներ, իսկ Նուբարաշենում ջրատարին են միացվել շինարարի կողմից կառուցված նոր ջրագծերը։ Բուն աշխատանքների ավարտից հետո սկսվել է համակարգի վերականգնման փուլը։ 1000 մմ տրամագծով խողովակաշարը պետք է աստիճանաբար լցվի ջրով, որից հետո հնարավոր կլինի վերականգնել համակարգի բնականոն աշխատանքը։ Ընկերությունից հայտնում են, որ կեսօրից բնակավայրերի ջրամատակարարումը կսկսի աստիճանաբար վերականգնվել։
Այսպիսով, հայտարարված 36-ժամյա ջրանջատման տևողությունը ներառում է ոչ միայն ջրատարի վրա կատարվող տեխնիկական աշխատանքների, այլև խողովակաշարի նախնական դատարկման և աշխատանքների ավարտից հետո այն կրկին ջրով լցնելու համար անհրաժեշտ ժամանակը։