Շրջակա միջավայր

     Անապատացում, ջրի, այդ թվում խմելու, անբավարարություն, անտառածածկ տարածքների նվազում, աղբի վերամշակման բացակայություն, օգնության կարոտ Սեւան… Շրջակա միջավայրի հետ կապված խնդիրները Հայաստանում քիչ չեն: Բնականաբար, մաս կազմելով Վեոլիա Գրուպին, Վեոլիա Ջուրն իրեն պարտավորված է համարում մասնակից լինել հիմնադիր ընկերության հետաքրքրության շրջանակում գտնվող այս բոլոր խնդիրների լուծմանը:
     Այսօր մենք զբաղվում ենք ջրամատակարարմամբ, հետեւաբար առաջին հերթին ձգտում ենք ինքներս արդյունավետ օգտագործել այս կենսական ռեսուրսը, բայց եւ նույնը պահանջում սպառողներից: Նաեւ կարեւորում ենք կոյուղաջրերի վերամշակումը, որը նոր մակարդակի կբարձրանա առաջիկայում Երեւանի «Աէրացիա» մաքրման կայանի մասնակի վերակառուցման աշխատանքների ավարտից հետո:
     Միաժամանակ, հնարավորությունների սահմանում իրականացվում են բնապահպանական այլ, այս պահի համար «ոչ պրոֆիլային», բայց հանրության համար շատ հրատապ ծրագրեր: Դրա լավագույն օրինակը «Մաքուր Սեւան-2017» է, որի համար Վեոլիա Հիմնադրամը հատկացրեց 50 հազար Եվրո: «Ֆրանս-հայկական զարգացման հիմնադրամի» մշակած այս ծրագրի շրջանակներում «Սեւան ազգային պարկին» ցուցաբերվեց զգալի օգնություն հանրային լողափերի մաքրման գործում: Համագործակցությունը ստացվեց, կողմերը գոհ մնացին արդյունքից, ինչը հույս է ներշնչում, որ ծրագիրը կլինի շարունակական՝ ավելի մեծածավալ ու գործընկերների ավելի ստվար կազմով:
     Ինչպես Երեւան կատարած իր այցի ժամանակ ասաց Վեոլիա Գրուպի խորհրդի նախագահ, գլխավոր գործադիր տնօրեն Անտուան Ֆրերոն, ապագայում նախատեսվում է Հայաստանում գործունեություն ծավալել շրջակա միջավայրի այլ ոլորտներում, մասնավորապես աղբի վերամշակման ու հանքային ռեսուրսների օգտագործման արդյունավետության բարձրացման  մասով: Կնշանակի՝ կընդլայնվի նաեւ շրջական միջավայրի պահպանմանն ու առողջացմանն ուղղված ծրագրերի շրջանակը՝ ի շահ Հայաստանի ու նրա բնակիչների: