Գործունեությունը

     Վեոլիա Ջուր ՓԲԸ սպասարկում է մայրաքաղաք Երևանը, 41 այլ քաղաքներ, 314 գյուղեր: Ընդամենը 356 բնակավայր: Դրանից բացի, այն մեծածախ ջրամատակարարման ծառայություններ է մատուցում 52 բնակավայրի: Ընդհանուր առմամբ ընկերությունը սպասարկում է 770 000 գործող բաժանորդի:     
     Վեոլիա Ջուր ընկերությունն իր շուրջ 3000 աշխատակիցներով հանձն է առել ապահովել սպասարկման տարածքի խմելու ջրի արտադրության և վաճառքի, կեղտաջրերի մաքրման համակարգերի կառավարումը, բնակավայրերի բաշխիչ ցանցերի արդյունավետության բարձրացումն ու զարգացումը:     
     Այս խնդիրների լուծման նպատակով ընկերությունում ստեղծվել են համապատասխան տնօրինություններ. «Արեւելք» եւ «Արեւմուտք» տարածաշրջանային, Երեւանի տարածաշրջանի եւ Մարզերի տարածաշրջանի առեւտրային, Տեխնիկական, Իրավաբանական եւ հաճախորդների սպասարկման, Վարչական: Գործում են նաեւ Որակի, առողջապահության եւ աշխատանքի անվտանգության, Գնումների, Հանրային կապերի ծառայությունները, Մարդկային ռեսուրսների սպասարկման, Նամակագրության եւ մի շարք այլ բաժիններ:
     Համաձայն պայմանագրի` Վեոլիա Ջուր ընկերությունն իր գործունեության ընթացքում նախատեսում է սպառողներին մատուցել 800 միլիոն եվրոյի ջրամատակարարման, ջրահեռացման եւ կեղտաջրերի մաքրման ծառայություններ, ապահովել 37,5 մլրդ դրամի ներդրում սեփական միջոցներից (հիմնականում առկա համակարգերի շահագործման, վերանորոգման ու պահպանման նպատակով) ու մուտքագրել պետբյուջե միայն որպես վարձակալության վճար 89 մլրդ դրամ:
     Վարձակալության պայմանագրով առաջադրված խնդիրների լուծմանն իր մասնակցությունը կբերի նաեւ ՀՀ ԷԵԲՊ-ի Ջրային տնտեսության պետական կոմիտեն, որը 5 տարվա ընթացքում նախատեսում է համակարգում իրականացնել շուրջ 200 մլն ԱՄՆ դոլարի խոշորածավալ ծրագրեր, մեծամասամբ նոր բազմապիսի կառույցների շինարարության կամ գործողների արմատական վերակառուցման ու արդիականացման նպատակով: